Ya manga usip sa 2 Téssalonika
Kapitulu 1
Basa͡a ya 2 Téssalonika 1:1‑2
1. Singalan ya manga eped ni Pablo pagsulat nan sa sulat yeiy?
2. Unu ya pigsekat ni Pablo adti Tyumanem na un nan atag adti manga mangintu‑uway?
Ya pagdasig ni Pablo sa manga mangintu‑uway na migti‑is
Basa͡a 1:3‑12
1. Ananga' to‑o pigsaya' ni Pablo ya manga mangintu‑uway dun ni Téssalonika?
(birs. 3‑4)
2. Unu ya pagpakabetang na manga mangintu‑uway dun ni Téssalonika? (birs. 5)
3. Pangkay kun pigpamulayaman ya manga mangintu‑uway manang gayed silan nyangintu‑u sa Tyumanem, unu ya anenganeng na Tyumanem seiy? (birs. 5)
4. Kun pigpamulayaman kitadun pangkay wala' ya sala' tadun, magmalit kita aw dili'? (birs. 5‑6)
5. Unu ya un ma‑imo' sa pagliku' ni Jisus Kristu eped na manga anghil nan?
(birs. 7 aw basa͡en pa uman ya 1 Téssalonika 4:13‑17.)
6. Singan ya pa‑emel‑emelen sa pagliku' ni Jisus Kristu? (birs. 8)
7. Unu ya pigsekat ni Pablo adti Tyumanem na imo‑un nan sa manga utaw adti Téssalonika? (birs. 11)
8. Asini birsikulu, unu ya du‑an na magdeyen ya manga utaw kan Jisus Kristu?
(birs. 11‑12)
Ya utaw na to‑o malatay na dumateng adti manga moli na allaw
Kapitulu 2
Basa͡a 2:1‑12
1. Unu ya piglong ni Pablo kanaten asini birsikulu 1 aw 2?
2. Piglong adti birsikulu 2 na dili' kita galu maksay mangintu‑u sa manga utaw na maglong na awun pigpa‑ede' kanilan na Tyumanem. Unu ya du‑an nan?
3. Unu ya muna dumateng bagu lumiku' si Jisus? (birs. 3‑4)
4. Ananga wala' pa kabukasi ya sambuk na utaw na to‑o malatay? (birs. 5‑6)
5. Kinunu sakanan bukasi? Singan ya migbalabag sa malatay na utaw yeiy? (birs. 7‑8)
6. Singan ya un dumeg sa utaw yeiy na malatay? (birs. 8)
7. Unun nan ya pagdeg kanan? (birs. 8)
8. Unu ya kaliman ni Pablo na ka‑ede‑an tadun sa utaw yeiy na malatay? (birs. 9‑10)
9. Ananga' ya manga utaw mabatug gawayan na utaw yeiy? (birs. 10‑11)
10. Unu ya awun datengan na manga utaw na kyumele sa tengteng tingeg na Tyumanem? (birs. 12)
Ya pagpakasalig sa pagpangintu‑u tadun
Basa͡a 2:13‑17
1. Unu ya pigpasalamatan ni Pablo adti Tyumanem asini birsikulu 13?
2. Kanu na Tyumanem pamalli‑a kun singalan ya un nan paluwa‑en?
3. Pig‑unu na manga utaw na taga Téssalonika ya pagka‑ede' sa madyaw na ubat‑ubat tepad kan Jisus? (birs. 14)
4. Unu ya du‑an na pigtawag kita na Tyumanem magi sa Ispiritu nan? (birs. 14)
5. Unu ya pakasaligen na manga mangintu‑uway? Unu uman ya dayawun adti anenganeng nilan? (birs. 15)
6. Anenganengen ya pagpanawagtawag ni Pablo adti Tyumanem sa manga utaw dun ni Téssalonika. Basa͡en dun ni 1 Téssalonika 5:9‑11.
7. Unu ya pigsekat ni Pablo adti Tyumanem na imo‑un nan sa manga mangintu‑uway?
8. Unu ya madyaw na pig‑iman tadun adti kamoliyan na allaw?
Balawbalawan: Basa͡en aw balawbalawan ya 1 Téssalonika 5:1‑11.
Kapitulu 3
Ya sekat ni Pablo sa panawagtawag na manga mangintu‑uway
Basa͡a 3:1‑5
1. Anenganenga mayu yeiy: Kun awun eped na manga utaw na mig‑imo' sa imo‑unun na Tyumanem, unu, madyaw kun magsekat kitadun adti Tyumanem sa kadyawan nan adti kanilan imo‑unun?
2. Unu ya pigsekat ni Pablo na panawagtawagan na manga taga Téssalonika adti Tyumanem? (birs. 1‑2)
3. Unu ya piglong ni Pablo adti birsikulu 3 sa bet na Tyumanem? (birs. 3)
4. Unu ya pigsekat ni Pablo adti Tyumanem na imo‑un nan sa manga utaw na un dumawat sa sulat yeiy?
5. Unun tadun ya pagkasiling kan Jisus Kristu? (birs. 5)
Ya pamene' ni Pablo na dili' kitadun magkataka
Basa͡a 3:6‑15
1. Singan ya mig‑atag sa katundanan kan Pablo aw manga eped nan na un nilan paglongun ya manga mangintu‑uway kun unu ya madyaw imo‑un? (birs. 6)
2. Unu ya puluglima dun ni manga mangintu‑uway? (birs. 6)
3. Ananga' nya‑imo' si Pablo pundinganan adti kanilan? Sa anenganeng mayu, madyaw kun dumalug ya kadég na mangintu‑uway sa manga imo‑unun ni Pablo? (birs. 7‑10)
4. Ananga' si Pablo aw manga eped nan migtalabahu aw migsambat sa kanilan manga kapelekan? (birs. 8 aw basa͡en uman adti 1 Téssalonika 5:14)
5. Sa kamayu anenganeng, asuntu na sugu‑anen si Pablo ni Kristu, mig‑iman sakanan galu na ya mangintu‑uway magtabang sa kanan manga kapelekan? (birs. 9)
6. Sa anenganeng mayu, to‑o malug ya piglong ni Pablo sa manga utaw na dili malim magtalabahu?
7. Sa anenganeng mayu, singan ya tengteng pigpalna‑uwan ni Pablo, ya manga bakleg aw buyag, aw kun ya manga pulid, aw kun ya manga mangkataka? (birs. 10)
8. Kun ya manga mataka na manga utaw dili malim magtalabahu, pig‑unu nilan baling ya manga allaw nilan? (birs. 11)
9. Unu ya piglong ni Pablo sa manga mangintu‑uway na mataka?
10. Unu uman ya piglong ni Pablo adti manga utaw na mangkaseb? (birs. 13)
11. Unun tadun ya manga eped na wala' dalug sa piglong ni Pablo?
Ya kamoliyan na piglong ni Pablo
Basa͡a 3:16‑18
1. Pangkay unu ya awun tadun datengan, unu ya pig‑atag ni Jisus Kristu kanaten asuntu na ise' kitadun na Tyumanem? (birs. 16)
2. Ayin indeg ya kalinaw na ginawa tadun?
3. Pig‑unu na manga mangintu‑uway dun ni Téssalonika ya pagka‑ede' na ya sulat tengteng indeg adti kan Pablo? (birs. 17)
4. Mabatug tadun uman ka‑ede‑an na gayed asini kanaten ya kadyawan ni Jisus Kristu? (birs. 18)
