Basa͡a ya Muna Pagpa‑ede' aw tubaga ya manga usip.
1. Ayin ya lunsud na Kolossas?
(a) Paninawa ya Kolossas dun ni mapa.
(b) Unu ya kya‑ede‑an tadun sa lunsud na Kolossas?
(c) Unu ya baligya‑enen na manga utaw dun ni lunsud yan?
2. Pig‑unu ya pagdateng na madyaw na ubat‑ubat kan Kristu dun ni Kolossas?
(a) Singalan utawa ya dyumala sa ubat‑ubat kan Kristu adti Kolossas?
(b) Unu ya punganan na manga utaw dun ni banwa yan?
3. Kanu ya pagsulat ni Pablo?
(a) Singalan ya pigsulatan?
(b) Singalan pa uman ya pigsulatan nan dengan na umay yan?
4. Wan ya du‑an na migsulat si Pablo sa manga taga Kolossas?
(a) Ananga' manaw si Épapras adti Roma na un magsekat sa palna‑u ni Pablo?
(b) Unu ya puntu na pigsulat ni Pablo asini liblu ini?
(c) Ayin pagkalintapun ya sulat yeiy?
Ini ya manga palna‑u na pigsulat ni Pablo asini sulat ini.
1:1‑2 Ya pagpangumusta ni Pablo
1:3‑14 Ya panawagtawag aw pasalamat ni Pablo
1:15‑23 Ya pagka Tyumanem ni Kristu aw ya pigpan‑imo' nan
1:24‑2:5 Ya pagud ni Pablo asuntu sa manga mangintu‑uway
2:6‑19 Si Kristu olo' ya dalugun
(a) Birs. 6‑7 Dalugun ya bet ni Kristu.
(b) Birs. 8‑10 Dili' pagdalugun ya katadeng na pig‑imo‑imo' olo' na manga utaw.
(c) Birs. 11‑15 Ya palpa na Tyumanem pada makasambuk da kitadun kan Kristu.
(d) Birs. 16‑19 Ya pamene' ni Pablo sa manga bala‑ud na utaw.
2:20‑3:1‑4 Ya bagu na ginawa na lyumekat adti kan Kristu
(a) Birs. 20‑23 Dili' pagdalugun ya manga palili na pig‑imo‑imo' na manga utaw.
(b) Birs. 3:1‑4 Gayed anenganengen ya adti tas na langit aw beke' olo' na asini tas na lupa'.
3:5‑17 Ya dadan na pagka‑utawun aw ya bagu na pagka‑utawun
(a) Birs. 5‑11 Dili' da tumanen ya pagkaliman na dadan na pagka‑utawun.
(b) Birs. 12‑17 Ya paggaginawa͡ay tadun aw ya pagpasalamat adti Tyumanem.
3:18‑21 Ya palna‑u ni Pablo adti manga ka͡ubayan aw eseg aw mangayse'
3:22‑4:1 Ya palna‑u ni Pablo adti manga allang aw sugu‑anen aw amu nilan
4:2‑6 Ya manga pamene' sa kadég na manga mangintu‑uway
(a) Birs. 2‑3 Ya pagpanawagtawag aw ya pagpakatanaw.
(b) Birs. 3‑4 Kaliman ni Pablo na mabangal ya ubat‑ubat nan adti manga utaw.
(c) Birs. 5‑6 Ya pagbekkal na manga mangintu‑uway sa madyaw na ubat‑ubat.
4:7‑18 Ya pagpangumusta ni Pablo sa manga ubaybay nan
(a) Birs. 7‑15 Pigngalanan ni Pablo ya kadég na migpadala sa pangumusta.
(b) Birs. 16‑18 Ya pagpakalintapun sa sulat ni Pablo.
Kapitulu 1
Basa͡a 1:1, 2 Ya pagpangumusta ni Pablo
1. Singalan ya pigsulatan ni Pablo?
2. Singalan ya eped ni Pablo migpadala sa sulat?
3. Unu ya piglong ni Pablo na padatengen adti manga mangintu‑uway dun ni Kolossas?
Basa͡a 1:3‑14 Ya panawagtawag aw pasalamat ni Pablo.
1. Kada pagpanawagtawag ni Pablo adti Tyumanem, unu ya piglong nan? (birs. 3)
2. Unu ya nya‑imo' na pigpasalamatan ni Pablo adti Tyumanem? (birs. 4, 5)
3. Unu ya pig‑iman nilan? (birs. 5)
4. Unu ya nyabekkal adti kadakula' na banwa? (birs. 6)
5. Unu ya nya‑imo' adti manga utaw na dyumengeg sa matinaw na ubat‑ubat? (birs. 6)
6. Singalan ya migpalna‑u kanilan sa kallat na Tyumanem? (birs. 6, 7)
7. Unu ya kya‑ede‑an tadun kan E'papras? (birs. 7)
8. Singan ya migpa‑ede' kan Pablo sa paggaginawa͡ay na manga mangintu‑uway dun ni Kolossas? (birs. 8)
9. Kanu pagpalekat ya panawagtawag ni Pablo kanilan adti Tyumanem? (birs. 9)
10. Unu ya pigsekat ni Pablo aw si Timotiyo adti Tyumanem? (birs. 9)
11. Unu ya un nilan kasilingan magi sa katadeng na Ispiritu na Tyumanem? (birs. 10)
12. Unu pa uman alag ya eped na pigsekat ni Pablo adti Tyumanem? (birs. 11)
13. Unu ya un paglongun na manga taga Kolossas adti Tyumanem asuntu sa kadyawan na pig‑imo' nan kanilan? (birs. 12)
14. Ngalani ya manga pig‑imo' na Tyumanem kanaten. (birs. 13, 14)
Ya pagka Tyumanem ni Kristu aw ya pigpan‑imo' nan
Basa͡a 1:15‑23
1. Asini birsikulu ini, unu ya ka‑ede‑an tadun adti kan Jisus Kristu? (birs. 15)
2. Singalan ya mig‑imo' sa kadakula' asini tas na lupa'. Ngalani ya kadég na nya‑imo' nan. (birs. 16)
3. Magi sa pagdumala ni Kristu, unu ya dayaw nan pigtapid? (birs. 17)
4. Singan alag ya nyaka‑akup adti palangad lawas ni Kristu? (birs. 18)
5. Ayin atagan ya kadakula' na katulus na Tyumanem? (birs. 19)
6. Unu ya katulus na dugu' ni Kristu adti krus? (birs. 20)
7. Idtu muna unu ya pagpakabetang tadun? (birs. 21)
8. Unu ya pagpakabetang tadun asuntu sa pagkamatay ni Kristu? (birs. 22)
9. Unu ya un tadun mabatug imo‑un asuntu na piglanas da nan saba ya manga sala' tadun? (birs. 22b)
10. Unu ya un tadun padelegen aw unu ya dili' tadun imo‑un? (birs. 23)
11. Unu ya ubat‑ubat na dyengeg tadun idtu muna na nyabekkal adti kadakula' na banwa? (birs. 23b)
Ya pagud ni Pablo asuntu sa manga mangintu‑uway
Basa͡a 1:24–29
1. Adti kamayu anenganeng, ananga' magleya si Pablo pangkay madég ya kalugan na kya‑agiyan nan? (birs. 24)
2. Unu alag ya talabahu na pigtaligu na Tyumanem kan Pablo? (birs. 25)
3. Unu ya kaliman na Tyumanem adun na manga allaw na un pakita' adti kadg dala ya manga Héntil? (birs. 26, 27)
4. Unu ya tud na palna‑u ni Pablo aw ni Timotiyo? (birs. 28)
5. Ayin lekat ya pagkabagseg na ginawa ni Pablo? (birs. 29)
Kapitulu 2
Basa͡a 2:1‑5
1. Asini tekap ini, dakula' to‑o ya pagud ni Pablo sa manga manguntu‑uway adti Kolossas aw adti Laodiciya. Ngalani ya manga tud ni Pablo dun ni kanilan. (birs. 1, 2)
2. Ayin katagu' ya kadakula' na katadeng na Tyumanem? (birs. 3)
3. Unu ya kyallekan ni Pablo na ma‑imo' adti manga mangintu‑uway? (birs. 4)
4. Unu ya to‑o nyakaleya kan Pablo? (birs. 5)
Balawbalawan:
Anenganenga ya manga tud ni Pablo adti manga bagu na nyangintu‑u dun ni sulat nan. Wala' ni Pablo olo‑a ya kanan pagkaliman aw ya kanan pagka‑utawun manang pigbetang nan adti anenganeng nan ya kadyawan nilan. Aw asini manga birsikulu wala' ya piglong ni Pablo sa kanilan kapelekan, manang yan ya kaliman nan na pakabagsegen ya kanilan ginawa, aw pakasaligen ya kanilan pagpangintu‑u. Adti kamayu anenganeng, unu ya ma‑imo' pundinganan kan Pablo?
Si Kristu olo' ya dalugun
Basa͡a 2:6‑19
1. Unu ya madyaw silingan na manga mangintu‑uway asini birsikulu ini? (birs. 6)
2. Ngalani ya duwa ya pundinganan sa pagpangintu‑u tadun. (birs. 7a)
3. Ngalani uman ya duwa ya pigpalna‑u ni Pablo na un dulugun. (birs. 7b)
4. Unu ya malat na un nilan pakatanawan asini birsikulu 8?
5. Ayin lekat ya palna‑u na galu'? (birs. 8b)
6. Ayin kita‑a ya kadakula' na pagka Tyumanem? (birs. 9)
7. Unu ya kadyawan kun sumambuk kitadun kan Kristu? (birs. 10)
8. Unu ka', awun pa matas kan Kristu na un magdumala kanaten? (birs. 10b)
Balawbalawan:
1. Adun na manga allaw ini, ya eped na manga mangintu‑uway dyumalug sa manga palna‑u na galu'. Unun tadun ya pagtabang kanilan na makalabet silan sa matinaw na palna‑u?
2. Unu ya kakawasan na pigsulat yeiy ni Pablo na “liwan na nyatuli' da kamu siling na manga Judiyu”? (birs. 11)
3. Unu ya kakawasan na “pagba͡utismu”? (birs. 12)
4. Unu ka' ya pagpakabetang tadun idtu muna sa wala' pa kitadun sambuk kan Kristu? (birs. 13)
5. Unu ya tubagenen tadun idtu muna na piglong na birsikulu 14?
6. Unu ya pig‑imo' ni Kristu na wala' da ya indeganan na busaw magdiklamu sa Tyumanem? (birs. 15)
7. Sa palna‑u ni Pablo asini birsikulu 16, unu ya dili' tadun pagkaagadan?
8. Unu ya pigpa‑unawaan ni Pablo sa manga katanem na manga utaw? (birs. 17)
9. Unu ya piglong ni Pablo na un nilan gayed pakatanawan? (birs. 18a)
10. Unu pa uman ya piglong ni Pablo sa manga utaw na sallong kunu migpadalem sa pagka‑utawun nilan? (birs. 18b‑1a)
11. Unu ya kya‑ede‑an tadun asini birsikulu 19 sa lawas ni Kristu?
Balawbalawan:
Si Kristu ya kanaten ulu. Unu ya datengan kun dili' mag‑isugpat ya kanaten paggaginawa͡ay?
Ya bagu na ginawa na lyumekat adti kan Kristu
Basa͡a 2:20–3:1‑4
1. Unu ya migpaluwa' kanaten lekat adti pagdumala na manga busaw na awun ni balintenga‑an aw asini lupa'. (birs. 20, 21)
2. Singan ya mig‑imo‑imo' sa palili? Ananga' dili' galu imo‑an sa palili ya kakanenen? (birs. 22)
3. Unu ya makamang na utaw kun dalugun nilan ya palili na pagkanen? (birs. 23)
Kapitulu 3
4. Unu ya kaliman ni Pablo pa‑imo' sa manga mangintu‑uway? (birs. 3:1)
5. Unu ya piglong ni Pablo na gayed anenganengen na manga mangintu‑uway? (birs. 3:2)
6. Unu ya pigtagu' dun ni tampid na Tyumanem? (birs. 3:3)
7. Unu ya datengan na manga mangintu‑uway kun lumiku' si Kristu? (birs. 3:4)
Ya dadan na pagka‑utawun aw ya bagu
Basa͡a 3:5‑11
1. Ngalani ya manga imo‑unun na malatay na dili' da imo‑un na manga mangintu‑uway? (birs. 3:5)
2. Unu ya ma‑imo' kun maybeg kita sa ka‑unan na eped? (birs. 3:5)
3. Kun magpadeleg mag‑imo' ya manga utaw sa malatay, unu ya kagamakan nilan? (birs. 3:6)
4. Unu ya kaliman ni Pablo pa‑imo' sa manga bagu na mangintu‑uway? (birs. 3:7, 8)
5. Unu ya nyaluwas adti bagu na mangintu‑uway? (birs. 9)
6. Unu uman ya un sutun na bagu na manga mangintu‑uway? (birs. 10)
7. Ananga' dili' magkibang ya Tyumanem sa utaw? (birs. 11)
Basa͡a 3:12‑17
1. Ngalani ya madyaw na bet na un dalugun na manga mangintu‑uway adti tag sambuksambuk kanilan?
2. Adti kanaten na mangintu‑uway, unu ya imo‑un na utaw na awun diklamu? (birs. 13)
3. Unu ya sampetan kun sutun tadun ya paggaginawa͡ay? (birs. 14)
4. Unu ya tumbay tadun adti kan Kristu? (birs. 15)
5. Unu pa uman ya tumbay adti seled na anenganeng tadun? (birs. 16)
6. Sa kadég na imo‑unun aw piglong tadun, kanyan ngalan ya un ngalanan? (birs. 17)
Ya palna‑u ni Pablo adti manga ka͡ubayan aw eseg aw mangayse'
Basa͡a 3:18‑21
1. Unu ya palna‑u ni Pablo sa manga ka͡ubayan? (birs. 18)
2. Unu ya palna‑u nan sa manga eseg? (birs. 19)
3. Unu ya imo‑unun na manga mangayse' na makatutuk sa Tyumanem? (birs. 20)
4. Unu uman ya palna‑u ni Pablo adti manga ama? (birs. 21)
Ya palna‑u ni Pablo adti manga allang aw sugu‑anen aw amu nilan
Basa͡a 3:22‑4:1
1. Unu ya paln‑au ni Pablo adti manga allang aw sugu‑anen? (birs. 22)
2. Unu ya un betang na manga sugu‑anen adti anenganeng nilan? (birs. 23)
3. Unu ya tandan na madawat tadun adti kan Kristu? (birs. 24)
4. Aw ya manga utaw na mig‑imo' sa malat, unu uman ya tandan na madawat nilan? (birs. 25)
Kapitulu 4
5. Unu uman ya palna‑u ni Pablo na imo‑un na manga amu adti manga allang aw sugu‑anen nilan? (birs. 4:1)
Ya manga pamene' sa kadég na manga mangintu‑uway
Basa͡a 4:2‑4:6
1. Unu ya pamene' ni Pablo na imo‑un na manga mangintu‑uway adti kanilan panawagtawag? (birs. 4:2)
2. Dun ni birsikulu 3, unu ya kalim ni Pablo na imo‑un nilan? (birs. 3)
3. Unu ya pigsekat ni Pablo adti manga taga Kolossas sa panawagtawag nilan? (birs. 4)
4. Unu ya piglong ni Pablo na pakatanawan na manga mangintu‑uway? (birs. 5)
5. Unu ya palna‑u kanilan ni Pablo sa paglong nilan? (birs. 6)
Ya pagpangumusta ni Pablo sa manga ubaybay nan
Basa͡a 4:7‑18
1. Singan ya sambuk na inulug na mangintu‑uway na tyumabang kan Pablo adti Roma? (birs. 7)
1. Unu ya tud ni Pablo sa pagpakawun nan kan Tikiko adti Kolossas? (birs. 8)
2. Singan uman ya eped ni Tikiko adti Roma na nyagad kanan madti Kolossas aw unu uman ya tud nilan? (birs. 9)
3. Ngalani ya kadég na inulug ni Pablo na tyumabang kanan adti Roma. (birs. 10)
4. Ngalani uman ya tulu ya manga Judiyu na tyumabang kan Pablo. (birs. 10, 11)
5. Singan ya inulug ni Pablo na nyatibulluk ya panawagtawag adti Tyumanem sa manga taga Kolossas? (birs. 12.13) Unu pa uman ya kya‑ede‑an tadun sa utaw yeiy?
6. Singan si Lukas? Unu ya talabahu nan? (birs. 14)
7. Ayin uman padala͡an ni Pablo ya manga pangumusta nilan? (birs. 15)
8. Pagkatigkas na taga Kolossas magbasa sa sulat ni Pablo, ayin pa uman padala͡an ya sulat nan? (birs. 16)
9. Unu ya pamene' ni Pablo kan Arkipo? (birs. 17)
10. Adti katigkasan na sulat, unu ya pamene' ni Pablo sa manga mangintu‑uway dun ni Kolossas? (birs. 18)
11. Unu ya awun gayed ni kanilan? (birs. 18)
Balawbalawan:
Idtu muna pigtaliguwan na Tyumanem si Pablo aw si Timotiyo sa pag‑ubat‑ubat sa tingeg nan adti manga Héntil. Adun na manga allaw yeiy, awun pa uman manga utaw na wala' pa pakadengeg sa Madyaw na Ubat‑Ubat kan Kristu. Sa kamayu anenganeng, singalan ya pigtaliguwan na Tyumanem na un mag‑ubat‑ubat sa tingeg nan?
Unu ya kyasilingan tadun asini sulat ni Pablo?
1. Ya pagpalekat sa pagkatipun na manga mangintu‑uway
Dun ni pigpan‑imo' ni Pablo aw si Épapras, kyasilingan tadun kun unun ya pagpalekat sa pagkatipun na manga mangintu‑uway. Si Épapras ya migpalekat sa madyaw na ubat‑ubat kan Kristu adti Kolossas aw Laodiciya, aw si Pablo yan ya migpakawun kanan. Yanagaw gayed ni Épapras pyanawagtawagan adti Tyumanem ya manga taga Kolossas. Aw pigpalna‑uwan nan silan sa tengteng na matinaw na ubat‑ubat pada to‑o dumalid ya kanilan pagpangintu‑u kan Kristu kay bagu pa silan nyaka‑akup adti kasakupan na manga mangintu‑uway. Si Pablo uman, gayed nyanawagtawag kanilan pangkay kun wala' pa nan silan kita‑a. Asini kanaten pagbasa sa manga bagu na nyampangintu‑u, kya‑ede‑an tadun na kun ya Tyumanem ya magbagu sa ginawa na utaw, ya sampetan nan to‑o silan mangintu‑u aw tengteng maggaginawa͡ay ya tag sambuk sambuk kanilan.
2. Ya pagpanawagtawag na madyaw silingan
Kyasilingan tadun uman adti kan Pablo ya pagpanawagtawag adti Tyumanem. Pyanawagtawagan nan ya mangintu‑uway na to‑o pa magkalalem ya kanilan katadeng sa kana Tyumanem aw dun da silan pakatutuk sa Tyumanem. Pangkay gayed kita migsekat adti Tyumanem sa madyaw na lawas aw sa pagsambat nan sa kanaten kapelekan manang ya kan Pablo pagpanawagtawag, yan ya pigkaypengan nan ya kalaluwa nilan. Aw pigsekat nan uman na magsambuk ya manga mangintu‑uway dun ni pagdadasigay pada dili' ya pagpangintu‑u nilan magkalumay aw to‑o nilan kalabetan ya tengteng na ginawa dun ni kan Kristu.
3. Ya pagtameng sa manga bagu na nyangintu‑u
Kyasilingan tadun uman kun pig‑unu ni Pablo ya pagtameng sa manga bagu na nyangintu‑u na dili' silan makasuway adti pangintu‑u na wala' ya guna aw dili' dumalug sa palna‑u na wala' ya katinawan. To‑o pigbangal ni Pablo adti kanilan kun singalan si Kristu, aw yan da olo' saba ya pigbetangan na katulus na Tyumanem aw yan olo' ya tengteng na Tyumanem. Yan ya to‑o matulus sa kadég na awun ni langit aw asini tas na lupa'. Aw pya‑anenganeng uman ni Pablo kanilan ya pagpaluwa' na Tyumanem kanilan asuntu sa pagpangintu‑u nilan kan Kristu. Kay idtu muna kya‑eletan silan adti kanan aw wala' ya kya‑ede‑an nilan sa kana Tyumanem manang pigpaliku' nan silan na un silan makasambuk adti kan Kristu. Ya pagkamatay ni Kristu adti krus, yan ya migpa‑iyuli' sa utaw adti Tyumanem aw yan uman ya dyumeg sa po‑on tadun na si Satanas aw yanagaw pigpakita' nan na pigdeg da nan ya busaw.
Yanagaw yan ya magtameng kanaten na nyampangintu‑u, ya pagka‑ede' tadun kun singalan si Kristu aw ya pagka‑ede' tadun na nyakaluwa' da kitadun lekat adti paggaway na manga palna‑u na galu'.
4. Ya matinaw na ginawa dun ni pagpangintu-u
Kyasilingan tadun asini sulat ni Pablo kun unu ya matinaw na ginawa dun ni pagpangintu‑u. Ya utaw na nyangintu‑u, dili' magsuwayenen dun ni pagdalug nan kan Kristu. Kay nyaka‑agad da kitadun sa pagkataw ni Jisus lekat adti nyangkamatay magi sa pagba͡utismu kamayu, aw yanagaw tibullukun tadun ya kanaten anenganeng adti kanan kadyaw aw dili' da mag‑anenganeng sa asini tas na lupa'. Ya utaw na nyangintu‑u, dayaw da nan pigluwas ya dadan na pagka‑utawun aw ya manga imo‑unun nan na malatay. Siling na dadan na kadégkadég na pigluwas tadun maynan uman ya pagluwas sa manga sala'. Aw sutun da tadun baling ya bet ni Kristu kay nyakasambuk da kitadun kanan aw yan da ya mig‑eya' asini seled na ginawa tadun.
